- Kad izgubite dodir s unutarnjom tišinom, izgubili
ste i dodir sa sobom. Kad izgubite dodir
sa sobom, izgubili ste sebe u svijetu. (E.Tolle)
Trebalo bi ponovno uspostaviti taj dodir. Mislim da
je Pučanstvo (Krešo) pokazao dobre znakove kada mi je poslao ovu zgodu koju je u trenutku nadahnaća napisao a ja vam je prenosim. Zove se britula a to vam je džepni nožić ili britva za rezanje
loze.A ljude iz priče poznam dobro!
Sam Guerino iz Lašići, di živim sa svojon ženom
Marčelom, već 53 lit. Imamo 3 dice, 2 sina i jenu ščer, ki je proprio prava. Ona
dva farabuta, ne znam ča bin moga dobrega povidati o njima, ma stalno mam nikih
problema, pogotovo sa onim mlajžim ki je ovega lita napunio 54 lit, vrag ga
zlega, i još ne dela, i samo hodi okolo, plaši ljude, hita po srnami kad ni
vrime, a vero i po kokošami. A ča da vam povidam.
Onaj još mlajži 51.5 lit je
dela poli onega, se ne domislim kako se zva, ma više ne dela poli njega. Ima 2
dice i ženu, jenu dobru, koja na svu sriću radi. Ma i tabak mu kupuje.
Jenega dan, prije 8 lit, je pasa poli mene moj prvi
sused Emilijano, i me zaiska britulu za rezanje loz.
San se vrga u pensir, propensa, ma sam mu da tu britulu koju mi je ostavija moj
pokojni tac, ki je imala preko 70 lit i ki ju je učinija onaj kovač iz
Krunčići. Su me pasivale najčrnije misli, sam ositia ko neku debulecu, i nis
bija siguran da če to dobro finit, ma šteso sam mu je da. San mu reka, Emilijano,
kada finiš, te molin da mi ju tornaš i da paziš na nju, kako sam to sva ta lita
ja činia; sam ju pra, brusia, luštra, deboto
sam bia u nju infecionan več nego
na moju Marčelu, o dici neču reč niš.
Pasala je jena šetimana, 2, i san odlučia poći poli
Emilijana da vidin ča je sa tom mojon britulom. Nis zna de je nabavio
novega breka, onega, pensan da je od
race, kako se ono kaže,
RUT MUL SERIJER, ma ne znan, vrag mu sve kosti
polomija. Kad sam šal prema hiži, odjedanput je skočia na mene, ki da me čeka, mi
scuka brageše, deboto me i ugriza za kolino, i vrag ni pušta, ka da sam vrga kolino
u moršu, tako me stiska . San gotov,s am pomislio, ča ču ovako finit, i u
zadnjem trenutku sam vidio jedan palun, onaj od kacije, sam ga zea i stuka mu
glavu, ma vrag ni mola, pa sam ga još jenom, ma dobro opalio. Beštija me molala
i pobigla, a ja san se polako torna, ma mi se peralo da je Emilijano sve to
čuria i niš ni stia učinit.
Na male sam se torna u hižu, i dobro da je bila
nevista tamo, i me je odmah popeljala poli onog mog mediga u Poreč, onega ki
liči one debele, i išijatiku i štitikecu nekim eliširima, beato lui.
Mi je reka da to ni niš, i me pita da li je brek
cipljen. A ča ja znam da li je brek cipljen, Emilijana nis pita. Je ima neke
vrage na ušima, i cilo vrime je nešto brontula, i deboto me ni niš čua ča sam
mu povida. San čua da mu iz glave gre neka mužika, ma ča je to za jeno. Varemengo
i takvi doturi. Me posla u Pulu , onakovega, zgriženoga svega rascuksnog i
krvavega.
Misec i po nisam moga hodit, ist ni pensat, a nisam
ni Emilijana pita za beštiju.
Potle 2 miseca sam zazva Emilijana , sa portuna, ma
nis šal nutra. Ona beštija me gledala poli ograde, i sam vidija da joj gre
slina na usta. Vrag jedan. Emilijano je doša poli portuna,i mi je reka da mu
britula još treba, i da će mi je tornat kada fini sa delom. Sam zna da ništo ne
gre pravo, i sam mu stia odgovorit da mi odmah torna britulu, ma je onaj vrag
počea lajati, i gristi želizdo od portuna, i sam popensa da je bolje da tornam
doma.
Potle 2 miseca i po sam ponovo torna do Emilijana, i
finalmente mi je torna britulu, i kada sam je zagleda, deboto me kolpo pogodia.
Ma ča je to za jeno, ča moja britula, sva scukana, ruzinava. Mi je pa mrak na
oči, i san reka Emilijanu da mi plati štetu ili ću poć poli vokata, na ča mi je
on odgovorija da se grem jebati ja i moja britula i moj vokato. Ona beštija me
je i dalje gledala i imala je oči ko oganj. San bia van sebe od rabije, da sam
ima pušku, bi hi oboje ubija i srušia mu staju.
Mi je povida sused Mirko da ma jedan vokato, priko
parkirališta, i da je špečalista za takove stvari i da će mi on sigurno rišiti
taj problem. Ma grem provat, možda ni tako munjen ki onaj dotur ki mu mužika
gre iz glave. Sam zazava Marčelu neka se pronta i smo pošli u Poreč.
Me doša gušt za kafelom, i smo sili ja i moja
Marčela, propio ispred vrati di dela vokato. Smo guštali kafe , i sam vidio
jenega čovika ki gre zgorom, pa zdolom, i
nešto si brontula. Ma sigurno je taj đir učinia 20 bot i mi se pera da sam čuo
rič alineja, neki Šmit, pa si je povida da su svi Slovenci konji, neki vražji
kontrati, ovrhe i još ostalega ma se ne morem tega sititi. Je hita glavu na
bok, na desno, pa si je bradom dotica košulju, raskočava brageše, zaveziva
pastole. Više ga nis vidija, ki da je u zemlju propa. Ma gvarda kakovih ljudi je na svitu, mi ga je
bilo ža, jadan čovik. A ča se more. Sam poša u njegof ufic, i deboto me kolpo
pogodia. Taj jadan čovik , kega sam prije vidija je bio šteši vokato. Ma varamengo. Ma ča je
to na ten svitu, oni dotur, pa ovaj. Ma...
Marčela me je počela cukati da gremo ča, ma se u
meni otvoria svit, sam dobia niku viru, kada sam vidia sve one libre i neke
harte ki su bile poslagane jena na drugu, visoko, skoro do šufita. Sam si reka,
to je moj čovik. Me gleda dimboko , šteso je jo hita glavu na bok, i me pita ča
sam doša. Sam mu povida ča me tokalo, i kada me posluša, je ima oči pune suz.
Marčela mi je prišapnula da se kalmam, vengo bi ga
moga kolpo udrit. Odjedanput se diga, mi se je peralo da je pred menom boškarin
od suseda, tako mi se pera, jak, velik, visok i povida NEČEMO SE FERMAT DOK NE
TORNAMO BRITULU KAKOVA JE BILA. Je poša prema meni, Marčela se sakrila iza
mene, ki vrag zna ča je pensala, a ni meni ni bilo svejedno, i me zagrlia. A ča
sam moga , sam i ja njega zagrlia. To je bilo pred 8 lit.
Ni da ni niš dela, se trudia, smo bili par boti na sudu ma se ona dižgarcija od Emilijana
nije prežentala, i sam vidija da mu pacienca gre varemengo, sam primitia da si
je počeo nokte grist, i mu se tornala ona debuleca, ma sad je glavu hita na livo.
Ni više predika sa sobon, ma svako toliko se počeo smijati kako lud. Jadan
čovik. Deboto sam popensa , ma ča je to od britule. Sam torna doma, zea
britulu, poša poli Emilijana, ona beštija je još bila tamo, mi je pokazala zube
i hitia britulu u kortu. Vražija britula, ča to more čovika tako rovinat, a ča
bi bilo se je radilo o tratoru.Ma…
Da, posla mi je
poruku priko mog suseda Mirka, da nečemo molat, da čemo se i dalje
borit, pa makar nas tokalo da gremo u ono misto poli Belgijaci, di čemo sigurno
dobiti .
Ala, živim u šperanci da još ima dobrih ljudi ki
žele pomoć.
Je Božić, sam se domislia da vokatu ponesem domačih
kobasic, jaja, pancete ombola, vero je zaslužia, i vina ću mu prinest.
Onom doturu niš!
Nema komentara:
Objavi komentar